Nordseeschule > Fächer > Deutsch

Deutsch

Dat is wedder so wiet: „Schölers leest Platt“

De Nordseeschool ut St. Peter-Ording is wedder dorbi: De Wettbewerb “Schölers leest Platt” is in de nächste Runn gahn. 2015/2016 löppt he ünner dat Motto „Ik bün dorbi“. Dat hett sik ok Schoolmeestersch Lena Grützmacher seggt un dat för eer School weer op‘e Weg bröcht. Dat is ok man goot so, dat se dat mokt. Dat Leesen in‘e Klassen fiev bet teihn is vörher över de Bühn gahn. De Besten hebbt sik för de Schoolrunn qualifizeert. Nu schull’n in twee Törns de Schoolsiegers för de Johrgänge fiev bet söben und acht bet teihn rutfunnen warrn.

Antreden weern Ragna Bielfeldt (9c), Neele Jacobs (6a), Lea Mutschall (5a), Anna Jacobs (10c), Lea Ebsen (7a), Pia Rabeler (8b), Johanna Sass (6b), Eric Küster (7b), Antonia Dircks (8a) un Mika Dundalski (5b). In düsse Reeg harr‘n se eer utwählte Geschicht vör to leesen. Dat harr dat Los so wiest.

Dat gifft extra so Leeshefte mit Geschichten. Fördert war’t de Wettbewerb vun de Sporkassen un eere Stiftung in Schleswig-Holsteen, un dat al 37 Johr! Veranstalter is de Heimatbund. Wat dat al lopen deit, dorvör sorgt de Böökerievereen. Der Schirmherrschaft hett Britta Ernst, de Ministerin för Bildung. De Leitung vun de Redaktion hett Marianne Ehlers. Se is Referentin för Nedderdüütsch in uns Land. So seggt man vörnehm för „Platt“.

Leesfertigkeit, Utspraak un Mimik harr een Jury to bewerten. De hett sik tosamen funnen mit Lena Grützmacher as Vörsitterin, Gudrun Fuchs ut Tat’n – se is Vörsitterin vun den Nordfriesischen Vereen - un de beiden Schoolmester Gonne Witt un Gunnar Bodewaldt vun’e Nordseeschool. Se harr‘n dat wiss ni licht, hebbt dat aver super mokt. Veel Möög geven hebbt sik al teihn Leesers. Markst aver doch, wo noch so richti Platt snackt warrt. Doch weer dat man liekers knapp mit de richtige Bewertung vun dat Leesen, vunwegen de beiden Besten to finnen. .

För de Klassen 7 bet 10 geev dat dree tweete Plätze. As Beste hett Anna Jacobs afsneden. Bi de Lütteren geev dat veer drütte Plätze, een tweeten un een ersten. Tweete wurr Lea Ebsen un an de Spitz keem Neele Jacobs. De beiden Süsters ut Wilhelminenkoog warr’t nu de Nordseeschool bi’n Landschops-Entsched vertreden. De warr’t in Februar/März 2016 in de Bökerien utricht.

Bet dorhen hebbt Neele un Anna noch Tied, eer Leeskunst to verbeetern. Goode Chancen hebbt se sachts. Eer Geschichten weer‘n „De pädagoogsche Opgaav“ vun Bolko Bullerdiek un „Kostas“vun Sophia Walden, düsse överdragen in’t Plattdüütsche. Mol sehn, welk Geschicht se sik nu utwähln dot und wat för een de tweete war’t. De war’t extra utsöcht.

Een hartlichen Glückwunsch geev dat för al teihn Leesers! Un ok een för de Jury!